Mannasetningar í kirkjum

Er það ekki orðið til að kóróna farsann í kringum skýrslu rannsóknarnefndar alþingis að láta skýrsluna liggja frammi í kirkjum líkt og þar sé um heilaga ritningu að ræða. Þessi hugmynd biskups undirstrikar hversu fráleitt það er að rekin sé sérstök ríkiskirkja.

Nefndarmennirnir í rannsóknarnefnd alþingis eru dauðlegir menn. Hún er ekki hafin yfir gagnrýni og það er einmitt mjög mikilvægt að hún verði lesin með gagnrýnum hætti og menn taki ekki þátt í hópmúgsefjun stjórnmálamannanna um "þverpólitíska sátt". Hvernig á heil þjóð að geta sæst um skoðun nokkurra ríkisstarfsmanna, hvort sem þeir hafa fimm háskólagráður - eða tíu?

Í skjóli leyndar þrífst spillingin

Athugasemdir

[Sigurbjörg Sigurðardóttir, 11.4.2010 kl. 13:48]

Hvar lendum við með þessu rugli??

[Birnuson, 11.4.2010 kl. 15:19]

Varðandi ríkiskirkju: Hvaða áætlun hefur Frjálshyggjufélagið um afnám hennar? Og ef sú áætlun er ekki til, hvenær verður hún sett á blað?

[Frjálshyggjufélagið, 11.4.2010 kl. 22:31]

Á Íslandi á að ríkja trúfrelsi og það er í andstöðu við frjálshyggju halda úti ríkiskirkju. Þó er engin plön hjá félaginu um að afnema ríkiskirkjuna. Þarf slík plön er ekki nóg að leggja niður styrki til hennar.

[Birnuson, 12.4.2010 kl. 14:08]

Við erum augljóslega sammála um að ríkið eigi ekki að styrkja kirkjuna. Vandinn snýr að samkomulagi um kirkjujarðir og launagreiðslur presta og starfsmanna þjóðkirkjunnar sem var undirritað 10. janúar 1997 og staðfest með lögum frá Alþingi. Þar stendur í 4. gr.:

Aðilar líta á samkomulag þetta um eignaafhendingu og skuldbindingu sem fullnaðaruppgjör þeirra vegna þeirra verðmæta sem ríkissjóður tók við árið 1907. Aðilar geta óskað eftir endurskoðun á 3. gr. samkomulagsins að liðnum 15 árum frá undirritun þess.

Ákvæði 3. gr., sem vísað er til, varða eingöngu það hvað ríkissjóður greiðir laun fyrir marga presta og aðra starfsmenn kirkjunnar. Ekkert er sagt um endurskoðun annarra þátta samkomulagsins. Kirkjueignanefnd þjóðkirkjunnar túlkaði þetta þannig:

Það er skilningur kirkjueignanefndarinnar, að afhending kirkjujarðanna og mótsvarandi skuldbinding ríkisins varðandi launagreiðslur sé gjörningur er standa eigi um ókomna framtíð. Kirkjujarðirnar verða þannig hér eftir sem hingað til trygging fyrir prestlaunum.

Jóhanna Sigurðardóttir lagði fram ásamt Guðnýju Guðbjörnsdóttur og Ögmundi Jónassyni breytingartillögu við frumvarp sem flutt var til staðfestingar ofangreindu samkomulagi, þess efnis að heildarendurskoðun skyldi fara fram á samkomulaginu eigi síðar en að 15 árum liðnum, „enda hefur ríkið ekki fjárhagslegar skuldbindingar samkvæmt samningnum nema til þess tíma“ eins og stóð í breytingartillögunni. Tillagan var felld (aðeins 17 sögðu já).

Jóhanna hafði um þetta eftirfarandi orð á Alþingi:

Í fskj. með frv. frá fjmrn. kemur fram að fyrir 20 kirkjujarðir sem seldar voru á árinu 1984–1996 hafi fengist 71 millj. kr. eða um 3,5 millj. fyrir hverja jörð. Nú veit ég að það er ákveðin einföldun á málinu ef tekið er þetta meðaltal, 3,5 millj., og margfaldað með þessum kirkjujörðum sem ríkið yfirtekur. Þá fær maður út 1,5 milljarða. En hver eru launin sem ríkisvaldið tekur á sig að greiða vegna prestanna? Það eru um 500 millj. á ári og í 15 ár er það þá um 7,5 milljarðar

Og síðar: 

[Þ]að er varla hægt að meta þessar kirkjujarðir hærra heldur en 7,5 milljarða sem ríkið verður þá búið að greiða í laun á þessu 15 ára tímabili til prestanna. Samt segja þeir alveg skýlaust og það er þeirra túlkun að ef um samningsrof verður að ræða eins og þeir orða það, þá vakni upp höfuðstóllinn frá 1907. […] [H]var stendur ríkisvaldið þá gagnvart kirkjunni? Ef bæta á kirkjunnar mönnum það eitthvað, segjum vegna aðskilnaðar ríkis og kirkju, […] hvað á þá að bæta? Hversu mikið á að bæta? Hver er þessi höfuðstóll? Erum við að viðurkenna það sem prestarnir segja að hér sé um óskerðanlegan höfuðstól að ræða sem vakni þá upp óskertur að 15 árum liðnum ef breyta á fjárhagslegum samskiptum ríkis og kirkju? […] Það getur orðið erfitt að leysa úr einhverjum deilum sem upp kunna að rísa að 15 árum liðnum eða á einhverju tímabili í komandi framtíð ef þinginu dettur í hug að breyta fjárhagslegum samskiptum ríkis og kirkju. Og ég held að við séum kannski með þessu að festa það skipulag sem við búum við í sessi um ansi langan tíma.

Spurningin er því: Hvað segir Frjálshyggjufélagið um þetta? Það er: Hvernig á að fara með þetta samkomulag um launagreiðslur presta og starfsmanna þjóðkirkjunnar?