Pappírshagnaður

Þótt Landsbankinn skili hagnaði upp á 14 milljarða króna er ekki öll sagan sögð.

Ef farið er inn á vefsíðu bankans og ársreikningurinn í heild sinni skoðaður kemur í ljós að sjóðstreymi var neikvætt upp á 3,2 milljarða króna á sama tíma og bankinn skilaði hagnaði.

Ef sjóðstreymið er skoðað nánar sést að sá hluti sem lýsir rekstrarhreyfingum var neikvæður um 3 milljarða króna.

Með öðrum orðum, þá skilaði reksturinn á árinu 3 milljarða tapi, þ.e. í „kassanum“ er 3 milljörðum minna af peningum en áður.

Það kom því í hlut skattgreiðenda að borga fyrir „pappírshagnað“ ríkisbanka.

Engin nýjung
Besta dæmið um pappírshagnað á uppgangstímunum var hagnaður Exista árið 2007. Nam hann 150 milljörðum króna á sama tíma og sjóðsstreymi félagsins vegna rekstrar var neikvætt um 37 milljónir, þ.e. borgaðar voru 37 milljónir úr kassanum fyrir 150 milljarða pappírshagnað. Allir vita hvernig það ævintýri endaði.

Afskiptalausir fjölmiðlar
Enginn fréttamiðill minnist á 3 milljarða neikvætt sjóðstreymi Landsbankans og spyr hverju það sæti. Það er ljóst að blaðamenn þessa lands hafa lítið lært af hinu svokallaða hruni.

Fjárfestingar fyrir skattfé
Hlutafé Landsbankans er fjármagnað með skattfé en ekki fjárfestingarfé þeirra fjárfesta sem eru tilbúnir að taka áhættu. Hinn almenni borgari hefur þar með tekið á sig tap af fjárfestingu, nauðugur viljugur, sem ákveðin var af stjórnmálamönnum og afdönkuðum embættismönnum inni í ráðuneytum landsins.

Væri ekki eðlilegra að bankinn væri í einkaeigu til að forða almenningi frá illa ígrunduðum fjárfestingum stjórnmálamanna?

14,3 milljarða hagnaður Landsbanka

Athugasemdir

[Stefán Júlíusson (IP-tala skráð) 10.4.2010 kl. 08:07]

Hver heldurðu að sé að pæla í sjóðstreymi ef það er hagnaður af starfsemi fyrirtækisins?  Ég efa að menn viti hvað sjóðstreymi er!!!!!  Flestir telja að hagnaður merki jákvætt sjóðstreymi.

Það er mjög gott að benda á neikvæða sjóðstreymið hjá Landsbankanum.

Það sem ótrúlegra er að ekki hefur verið rætt um stöðu Reykjanesskaupstaðar.  Skoðið rekstrarreikninga og efnahagsreikninga og sjóðstreymi þess sveitarfélags.  Ekki skrýtið að HS Orka fékkst fyrir aflandskrónur.

[Helgi (IP-tala skráð) 10.4.2010 kl. 18:17]

Góð grein!!

Svo megið þið gjarnan benda á það að við erum með alltof marga þingmenn á Alþingi ef miðað er við Norðurlandaþjóðirnar. Væri ekki nær að fækka þingmönnum en heilbrigðisstarfsmönnum?